لك كبسي انتر !!!

/ النت /

اختراع مذهل اختصر الكثير من الوقت والجهد في الحصول على المعلومات .. واختصر الوقت في التواصل مع الأقارب و الأحبة عن بُعد ..

لاشك أنه للرسائل طعمٌ خاص مذاقٌ مميز .. فجزءٌ من شخصيتنا يكمن في طريقة الكتابة وتعطير الورق شكل الخط الألوان كل شيء ..

مازلتُ مع إرسال الرسائل الشخصية في المناسبات و ارسالها بشكل يومي عن طريق النت ..

لكن والدتي الغالية ..

صعب عليها في بداية الأمر استيعاب المعنى الحقيقي لل / إيميل /

بدأتُ بشرح الخطوات ..

يا ماما هون المرسل إليه

هون العنوان

هون الرسالة ..

يعني متل رسالة مرتبة خالصة مخلصة من دون طابع مشي .. ؟

بتقللي : مشي ..

ماما .. بتكتبي الرسالة على برنامج الوورد .. بعدين بتعمليلها سيف .. بعدها بتأشري عالرسالة كلها بتصير باللون الأسود .. بعدها بالزر اليميني للفارة .. بعدها كوبي ..بعدين بتدعسي عالشنتاية بالايميل شفتيها : هي معناتها دلقلي كلشي كتبتو على هالصفحة .. وبعدها (( كبسي انتر )) بتنبعت / كم هائل من الملعومات /

بدأت بتسجيل المعلومات على دفتر التكنلوجيا الخاص بها .. وحفظها ..

لكن وللأسف في كل مرة تريد إرسال رسالة لخالتي المغتربة تنادي بي لأذكرها باسم المستخدم وكلمة السر و بقية المعلومات ..

بعد جهد جهيد تم تخزين المعلومات ليس فقط في دفتر التكنلوجيا الخاص بها بل في الدفتر الأساسي و ارتحت من دروس الايميل المطولة

/ وبصلتي المحروقة اللي صارت هلأ صفوة بصل ! /

أتينا للاختراع الجديد في الانترنت ألا وهوَ المسنجر ..

( الله لا كان جاب الغلا )

اختصر المسافات و الكثير من المال ..

ماما : علميني عالمسنجر بدي احكي مع خالتك منو ..

أنا : ايه مو على عيني ..

بدأنا الآن في مرحلة الدروس الخصوصي في / المسنجر /

المسنجر : من المستحيل فهم تكوينه ومن المستحيل تشريحه و حفظ طريقة الدخول إليه .. شيء يتعذر على الكبار استيعابه ..

أنا : أمي شايفتيه هاد .. هي شاشة المحادثة هي أنتي وهي هيه .. بتقليلا مرحبا كتابي و (( كبسي انتر )) بتقلليك أهلين كتابة كل كلمة انتر .. و بتاخدي وبتعطي معها .. مشي؟

بتقللي : مشي ..

تركتها لمدة قصيرة ..

في المرة الأولى .. حين حصل اللقاء المحتوم ..

بدأت كل من خالتي وأمي تكتبان رسالة بحالها في سطور المسنجر / من دون انتر / .. كل وحدة بديرة .. هي بتقللها مبارح عملت وساويت ... وأمي بتقلها بعتلك طرد ..

(^_^)

أجيت أنا المعلمة ! :)

انا : لك امي شو عم تعملي (oO).. مو ضروري تكتبي رسالة .. هون .. قللي لقللك خود وعطي مرحبا أهلين هيك عالسريع .. مو صفحات .. لك (( كبسيلها انتر )) ..

أمي : شو بدك فيني أنا هيك بدّي .. ما بدي اكبس انتر ..

أنا هون وصلت لمرحلة العجز في شرح تكنلوجيا النت ..

أحتاج إلى دروس خصوصية لشرح طريقة شرح النت لذوي الخبرات القليلة ..

أعتقد أن طريقة / قللي لقللك / تصعب على البعض ..

الله يخلليلنا التلفون

لك مشان الله ... كبسو انتر ...

عن المدونة:

تراتيلٌ روحيـــة عُزفت في يومٍ شمسهُ ساطعةٌ دونَ أضواء .. دون مقدّمات تقليدية .. دون زغاريدٍ ولا تهاليل .. ولادةٌ جديدةٌ للفرح .. و عرسٌ دونَ أصوات كان عريسه القلـــم ..