كره كوز وعيـــواظ .. وشرحـــــــــو !

لكل من لا يعرف كره كوز وعيواظ ..

عبارة عن شخصيات مسرحية من مسرح الظلّ ..

و هذه الحكايا التي سأقوم بكتابتها مأخوذة من كتاب لم يتم نشره للمؤلف إدموند سوسي خلال إقامته في سوريا لكن المؤلف ترك مشروع نشر هذه الحكايا وتم نشرهم الآن عن طريق المعهد الفرنسي بدمشق بموافقة السيدة سوسي .. و هذه المعلومات كلّها مأخوذة من كتاب / يا مال الشام / للأديبية / سهام ترجمان / ... فاتفضلوا وبرجلكون اليمين :)

عيواظ : الله لا كان جاب الغلا وجاب أيامو !!

اي فين رحت وغطيت وبسابع ارض اختفيت ؟! اي خمنت اكلك البعبع ولا خطفك الزعزع وقلت شريكي وين اختفى ليكون ضاربو بكري مصطفى !! وبعت وراك مدلل يضربك بالمندل !! تاريك داير عم تتسلى .. وأنا بالدكان عم اتقلّى ... اي وين رحت وغبت ومتل الملح ودبت !!؟؟

كره كوز: اي اي بقا لفا عيواظ ...!!! شو بك فتحت مواهبك .. وعملتلّي قصة شعرية !!

اي وين بدي غيب رحت تسوقت بضاعة واجيت شمشكريك !!

عيواظ : شمشكرك مشممشرك ما يعرف يشرشك يشرشك باب دار !!

خمنتك لعبت طميمة انت وجارك ولا نتعك عفريت من مخّارك !!

وهفيت من الدنيا أخبارك وصار عندي نهار مبارك !!

كره كوز: اي اي لا تخاف عليي عيواظ !!

عيواظ : انا مالي خايف عليك بس خفت عالألف ليرة يلي سلمتك ياها . حق البضاعة لتقوم تهرب فيها .. وما تعرف شو تاليها ! حيث بعرفك قليل أمانة وبتتأمن على قشرة بردقانة !!

كره كوز: اي حاجة بقا عيواظ ... شو هالحكي هاااد ... أنا رجال محشوم أدمي !!

عيواظ : نسيت انو ابليس مامات .. ؟؟! وانت وياه اخوات ! وانو المال غرار وسحر ومكار ... ياما فرق ين الابن وابو والاخ وأخو

كره كوز: اي بس أصابيعك مو كلا سوا عيوااظ !!! هي أنا جبتلك فاتورة البضاعة يلي اشتريتها والمصاري يلي دفعتها شمشريك !!

عيواظ : اي هات لشوف هالفاتورة شو تسووقت وشو اشتريت ؟؟!!

كره كوز: خود اقرااها عيواااظ ...!!

عيواظ :هات ... اي سيدي .. مكتوب هون دزينتين جرابات نايلون نمرة 9 سعر 700 و 45 ونص شرحو نمرة 11 شعر 700 و68 وربع شرحو نمرة 8 سعر 635 وشرحو نمرة ... شو هاد كره كوز؟!؟!!!!

كره كروز: شو عيواظ ؟؟!

عيواظ : انت شو اشتريت بضااعة ؟؟!!

كره كور: اي ... اشتريت يلي عم تقراهون بالفاتورة عيواااظ !!

عيواظ : اي هليي فهمتو بالفاتورة دزينتين جرابات نايلون لاكن شرحو اللي ما فهمتو !!! انت رحت اشتريت بضاعة من المحل واللا اشتريت شرحو شرحو شرحو ؟؟! وإجيت يا غشيم ؟!

كره كوز : لأ اشتريت بضاعة ... جرابات قمصان محارم .. كرافات .. كولونات !!

عيواظ : اي وينهون ... كل الفاتورة شرحو شرحو ...شرحو ؟؟!!

كره كوز : اي وقف استنى لنشوف شمشريك !!

عيواظ : ها .. هي رح نقرا الفاتورة التانية .. هممممم .. مكتوب هون اربع دزينات قمصان رجالية مقاس 39 شرحو مقاس 27 شرحو مقاس 40 شرحو مقاس كذا ..شرحو بطيخ مذا !!وهي الفاتورة التانية كلها شرحو شرحو شرحو شرحو بقااا !!!!!!!

بعتتك مشان تشتريلي وتتسوقلي شرحو ... وتجبلي شررحو .. شرحو عالمحل يا رح ميم ألف ر !!!

كره كوز : والله ضاع عليي شنكاش يا عيواظ .. بس انا شاري متل ما قلتلك ... مالي شاري شرحو أبداا ...

عيواظ : اي خود الفواتير وروح رجاع لعندو وقللو الغلط مردود ... نحنا شاريين بضاعة ... مالنا شاريين شرحو يا حبيبي بنووووووب

كره كوز: اي خبرو بالتلفون أحسن عيواظ ....!!!

عيواظ : اي والله جبتا .. دق الحديد وهو حامي هه .. وهي مسكنا السماعة بقى سيدي هه .. صفر .. صفر .. صفر.. صفر

كره كوز: خليني احكي معو عيواظ ...

عيواظ : لأ انا رح احكي معو .. لأنك مو خرج تاخد وتعطي وتتبلضم بين التجار ....

صوت ضعيف : الو .. مين ؟؟!

عيواظ : أنا داعيك أبو معوظة أخي ...

الصوت : منو هاد ....؟؟!؟!؟!

عيواظ : أنا ... أبو معوظة .. عيواظ عيواظ عم يحكي ...

الصوت : إي أهلا وسهلا ..

عيواظ : بالمأهل يا سيدي ...

الصوت : أمر ,,,؟!

عيواظ : أخي . هديك الساعة ... اشترى شريكي كره كوز من عندك بضاعة وعطيتو فيها فوتير .. ومكتبو فيها شرحو شرحو شرحو ... بقى نحنا شاريين جرابات وقمصان ومحارم وكرافات مالنا شاريين شرحو ...

بقى اذا كان من اول معاملة بيننا وبين محلكون بدو يصير غش و تلاعب .. هاد مو أصول تجاري أبداً ...

الصوت : هه ه ه هي ...!!

عيواظ : ليش عم تضحك ؟..؟ بيظهر مالنا تجار أنا وشريكي معبيين عينك؟

صوت التاجر العجوز : عفوا عيواظ ... قلّلك عيواظ أفندي لكن ابليس بيمدح حالو ... أنو البضاعة بتنكتب دائما ملخصة بالفاتورة ...

مثلا عواض ما نكرر عشرين مرة ونكتب جرابات جرابات جرابات ... منلخصها ومنقول شرحو ... قمصان المقاس الفلاني العلاني شرحو كذا ... ذرحو كذا .. محارم جنس كذا ... كلو بيدّون بالفاتورة ... شرحو شرحو شرحو ...

بقى فمت انت وشريكك كره كوز شو يعني شرحو ؟؟؟

عيواظ : اي فمت ..

التاجر العجوز : شو يعني شرحو ..؟

عيواظ : يعني شريكي حمار ... وأنا شرحو .... :)

نعتذر عن الكلمات المخلّة بالآداب فقد تمّ نقلها كما وردت ..

كما ورد في كتاب يا ما الشام أن السيئة الرئيسية في هذه النصوص هو احتواؤها هكذا تعابير ربما لن يستسيغها بعض الناس ..

في الختـــــــــــام سلام في الحلقة القادمـــة ...